Јас сум најголемиот, јас сум најдобриот"
"Кога си голем, едноставно не можеш да бидеш скромен". Оваа реченица најдобро го опишува животот на Мохамед Али или Касиус Клеј, најдобриот боксер на сите времиња. Тој пред 40 години, стана "крал на светот", откако со технички нокаут во седмата рунд
"Кога си голем, едноставно не можеш да бидеш скромен".
Оваа реченица најдобро го опишува животот на Мохамед Али или Касиус Клеј, најдобриот боксер на сите времиња. Тој пред 40 години, стана "крал на светот", откако со технички нокаут во седмата рунда го совлада Сони Листон. Денес, и покрај тоа што е тешко болен (Паркинсова болест), 62-годишниот Али е жива легенда, симбол на една епоха, во која телевизијата го претвори боксот во првокласна атракција.
- Го покорив светот, јас сум најголемиот, воскликна Клеј на 25 февруари 1964 година, пред телевисзиските камери во рингот во салата во Мајами, веднаш по освојувањето на светската титула во тешка категорија и тоа на само 22 години. Боксувајќи во својот уникатен стил, со движења како пеперутка и напади како змија, Клеј ги урна сите очекувања и прогнози кои велеа дека 32-годишниот Листон (облозите беа 6:1 против Касиус) нема да биде поразен. Весниците потоа пишуваа дека мафијата му платила на Листон да отстапи, по што Клеј влезе во отворена војна со нив.
Неговите изјави, долги зборувања и мудри изреки ќе останат запаметени засекогаш. Со нив тој придонесе интересот кон боксот вртоглаво да се зголеми. По откажувањето, под притисок на сопругата (без ниту еден пораз), на Роки Марчијано во 1956-та година, боксот загуби многу, но црномурестиот боксер ја поврати неговата слава.
Клеј се карактеризираше со одлична способност за говорење пред медиумите, во времето кога останатите спортисти ретко се одлучуваа да прозбарат јавно. Тој дури прогнозираше во стихови. За кратко време заработи многу повеќе пари од сите свои претходници во тешка категорија. Знаеше да биде и контроверзен, и го изненади целиот свет кога своето "ропско име" го промени во Мухамед Али и се посвети на исламската религија. Во 60-тите и 70-тите години Мохамед Али стана попопуларен и од претседателот на САД и од најголемите sвезди од шоу-бизнисот. Кариерата ја започна на 12 години, кога ја оствари и првата победа. Од рингот не излезе во наредните 27 години, со исклучок на периодот 1967-70, кога му беа одземени правата за натпреварување, поради тоа што откажа да се пријави во армијата и да замине во Виетнам. Веќе на 18 години зад себе имаше 108 аматерски борби, а во 1960 година се закити и со олимпиското злато на ЛОИ во Рим. По враќањето во САД го фрли в река медалот во знак на протест за обесправеноста на црнците. На ЛОИ во Атланта 1996 го запали олимпискиот оган, а му беше врачена и репродукција на златниот медал од Рим.
Мохамед беше шоумен парекселанс. По мечот со Џери Коури кој веднаш потоа се повлече, следеше борбата со Џо Фрејзер за враќање на конфискуваната титула светски шампион.
- Тој маж нема врска со мојата титула. Јас сум убав, тој е грозен. Јас сум шампион, тој е губитник. Многу сум брз и ќе го претепам пред Господ да дознае за тоа, знаеше да ги разгори страстите пред борбите Мохамед.
Но, неговата арганција завршуваше во соблекувалната каде тој се соочуваше со неправдите врз неговата раса.
- Тоа е мојата судбина. Господ ме направил славен за да можам да ги решам проблемите на мојот народ: дрога, проституција, недостаток на образование.
Јас сум светски шампион и тоа не само во боксот, туку и на сите раси, религии и држави, предопределен да спаси 30 милиони црнци во САД, изјавуваше своеврено Мохамед Али привлекувајќи милиони обожаватели низ целиот свет.
- Парите не се ништо за мене. Јас сум богат во умот и здравјето. Тоа се најважните нешта за мене во животот, беше мотото на најколоритната, скандалозната и харизматична личност во боксот.
Мохамед Али се прости со боксот во 1981 година и оттогаш во рингот не се качила толку исклучителна фигура како Касиус Клеј или Мохамед Али - боксерот, кој успеа недвосмислено да го претвори светот во своја публика.